Normalmenti maior problema ki tem na afrika e empoderamentu di sosiedadi sivil.
Ka podi tem um sosiedadi sivil konsienti forti i resistenti si e ka tem si propi autonomia si propi kapasidadi di jera rekursu nau so material komu spiritual; teknikus i umanus.
Si sosiedadi sivil ki tem riprizentasom di omis i mudjeris i kriansas kontinua ku mom stendidu nu ta kontinua um sikulu visiozu ki ka ta kaba i ta perpetua di jerasom a jerasom.
Dipos di perkori 9 anu na terenu di Kau verdi asosiasom Pilorinhu sta ganha konfiansa na lansamentu di um marka a nivel kontinental i internasional: Deug Deug 27.
Di kes prinsipal rezultadus pratikus e ki dja nu kumesa instala um atelier na Kau verdi i Na Ethiopia em simultaniu:
Dja na Senegal i Afrika di Sul nu teni ativistas interesadu a fazi ponti di ligasom.
Nos foku e kontinenti afrikanu nos klientis podi sta na kualker parti di mundu. Nos Bazi prinsipal sta na Kauverdi ou seja na nos pais di orijem undi sta ativista ki sta luta pa prizerva i ganha um konfiansa di si propi povu ki odjal ta nasi.
Nos bazi e ka kapitalista. nu kre valoriza nos propi produsom.
Poku a poku nu avansa sabi. Primeru entrada na interior di kontinenti kumesandu pa porta senegal.
La nu da primeru pasu pa kriasom des marka Deug Deug ki signifika Verdadi na lingua Wolof.
Di la nu riforsa koperasom ku orijem ou seja ku kuartel jeneral Pilorinhu um sentru di trabadju komunitariu nos prinsipal motivasom i nos razom di izistensia.
Deug Deug ka tem signifikadu nem valor si ka ta existi trabadju konstanti na Kabu Verdi.
Gosi dja nu stika nos pe pa otu ladu di kontinenti; paiz di kafe i di undi ki ta konsideradu ma storia di umanidadi nasi ou seja na Etiopia.
Purtantu nos ideia e riforsa lasus kultural entri es tres primeru pais i tambe koloka afrika di sul na asuntu.
Nos priokupasom e primeru ganha autonomia di asosiasom kria um bazi di produsom i formasom na nos komunidadi txada grandi mas tambe na ethiopia i spandi produtus pa kuatu kantu di afrika.
Nu ta kridita ma es kriasom ku djunta mom podi ser um grandi elementu simboliku na kontinenti afrikanu.
E um manera di djuda kauverdianus rikonhesi sis identidadi; di riforsa uniom entri paizis afrikanus i dexa novu jerasom ku um bazi solidu di ekonomia tradisom i kultura.
P
 |
| Marley ta spresa sentimentu Kabralista duranti 7 Marxa Kabral. Marley e jerasom di kriansas ki ta bem kontinua nos trabadju di resistensia. Purtantu e prezizu dexas ku bazi ekonomiku solidu pa es ka bem infrenta mesmu situasom ki nos di diskonhesimentu di nos identidadi atraves di lavaji serebral |
 |
| Num komunidadi di Oromo um di kes povu mas tradisional ki fika na fasi di tera. Nos ideia e leba nos marka ki ta komunika nos intensom di um afrika unidu di kriansas ki ta kria sem um barera di limitis. ou seja nos papel e di riforsa uniom i kunhesimentu di diferentis realidadis kultural etniku i spiritual afrikanu |
 |
| pikenus dimontrasom di trabadjus realizadu pa pilorinhu na Ethiopia. kes prumeru bolsa tevi sis promerus klientis interesadu paizis komu EUA Fransa i Austria. |
 |
| nos promeru logu. ideia e instala um marka ki tem um konjuntu di informasom sobri nos identidadi nos luta nos resistensia i nos storia i mas importanti nos foku: |
 |
| speriensia ku Shivru um di kes protagonista di um projetu turismu ekolojiku i sustentavel na montanhas mas altus di Ethiopia ku povu Oromo. |
 |
| kriansas na Kau verdi ki resebi nos primeru produsom di forma gratuitu 65 muxila fetu pa um senegales na nos atelier na CV. |
e baziadu na pensamentu ma unidu nos e mas forti i ma e forsa ki nu mesti. tudu nos trabadju e fetu na bazi di pensamentu di proximu jerasom.
Djudanu konkretiza es ideia e djuda bu propi povu toma konsiensia di si realidadi di si identidadi.
fazi parti des sonhu djuda ku poku ki bu podi diretamenti pa bazi na Kabu verdi. Fazendu isu bu sta valoriza kunesimentus i bu sta pruveta eransa di luta kabralista.
Nu sta konta ku bo
