A PARTIR DDI LI NU POI NOS MOM LI

A PARTIR DI LI NU POI NOS MOM LI

Kantu nu kumesa es trabadju, nu ka tinha konsiensia di si impatu nem di riskus ki nu sta koreba.

Di fika ku tudu risponsabilidadi di stadu riba nos kosta. Si ki maioria di morador taa pensa, me nos ki tem kii rizolvi ses problema pa mo stadu poku e ka ta odja.

Desdi 2010, ti txiga oxi, kantus algem sta paradu ta odjanu inda undi nu kre txiga.

Stadu Kabu Verdi sabi bem ki problematicas sosial: pobreza, delinkuensia, kriansas na rua, dizempregu, vandalismu, gravidez prikosi, toxikodependensia entri varius otus problemas ka ta rizolvidu so ku pulitikas makru-ikunomikas ku kriasom di infrastruturas fizikas.

E  prizizu tambe obi voz di kumunidadi i di lideranças ki diariamenti sta fosi i tambe odja kumpanha i djuda sigi pa frenti, kela ke si papel.

Um stadu ki ta presta debi valoriza vida di jovem pa ka mori em vom, valoriza kriansa ki sta na rua ki kabral fla me flor di revolusom, valoriza trabadju kumunitariu konformi debi ser.

Es é um grandi luta. Luta pa abri sosiedadi konsiensia i mostral rialidadi. Tem prova mas di ki si? undi ki nu txiga, lembra pilorinhu i vida di jovem ki ta trabadja nel.

Nos maior pena é pamodi ainda ka odjadu ma debi pustadu na intervensom sosial di bazi dentu kumunidadi.

Ka ta izizti ti gosi um verdaderu pulitikas di artikulasoom publikas i organismu di sosiedadi sivil tal komu nu ta prupoi, podi ser ki nu ta bem tem mas ti gosi nada disu, o seja insufisienti.

Nu trabadja na aria mutu sensível, prumovi Paz entri jovens ki sta traba kumpanheru vida, da jovem ki staba na droga ou ki sai di kadia alternativa di vida.

E ka nos so nos papel GUVERNU, KAMBRAS i tudu algem tem ki poi si mom. A nos si nu ka djudadu mo ki nu ta djuda, pamo ki es ta djudadu?

Nos so nu ka ta podi. Impossível. Kantu kuza dja nu fosi i kantu nu pudia foseba. Kantu bes dja nu kai i nu torna labanta so pamodi nu tem algem ki ta kridita na nos.

E verdadi ki nu risebi alguns apoiu di stadu, mas ka foi sufisienti ou seja nu ka mesti vivi di subisistensia.

 Nu kre ser kapaz di djuda kriansa i jovem so ki sertus kuzas ta ultrapasanu.

Sera ki so limpeza di Pilorinhu i spasu Finka Pe na splanada Lemferrera i sis dinamizasom e ka motivu?

 

Nu kompu nos terra djuntu ku tudu algem ki kre, tudu algem e bem vindu, sobritudu kes ki nu staba djuntu mas ki pur algum razom tevi di dexanu.

DJUNTU NU TA LABANTA KAU VERDI

 

Kem Ke Nos

Asosiasom Pilorinhu tem munti istoria pe konta. Mo ki e nasi, mal ku bem ke passa i ki e sta passa.

Um istoria ki podi tem mas di mil kontador, kada um ku si visom, i si speriensia.

Istoria otu triste, i otu maguadu, alguns fika i otus kontinua. Sempri na razistensia nu ka sabi kantu ki ta fika pamo munti fika pa tras.

Dja algum tempu ki nu ta pensa na um asosiasom pa lijitima nos pozisom djuntu di Stadu nos país.

Asosiasom ta trabadja ku varius duminius, mas konkretamenti si atensom spesial e pa kompu spasu publiku abandonadu i das um vida, um luz.

Torna spasu mortu num spasu undi tudu algem podi leba kel ke sabi, i podi ser valorizadu i rikonhesidu pa kel ke ta fazi.

Um spas upa jovem ku kriansa okupa ses tempu em vez di fika fitxadu ta straga ou ta romba.

Nu kre da tudu kumunidadi um speransa di vivi midjor manham. Nu ta pusta txeu na kriansa abandonadu na rua, di família distruturadu.

Nu ta apusta na idukasom di bazi na buska kunhesimentu di kada kenha ki sta interesadu dentu si kumunidadi.

Oki nu djunta mo kada um di a kordu ku si speriensia ku si raiz e ta inxina ou e ta prendi. Nu ka tem obijetivu na apropria di nenhum spasu mas simplismenti fazi kom ki kada um dezejas i fazes um patrimoniu bibu pa sirbis konformi debi ser.

 

Nu ta valoriza patrimoniu local, nu ta fazi intervensom na varius arias di kunhesimentu humanu, partikularmenti, kultura, kultivu di terra, espasu di formasom i di leitura, amizade i dizenvolvimentu umanu.

 Nu kre kria um korenti pa tudu spasu okupadu pa partilha speriensia pa adjunta pissoa mo tabanka.

 Asosiasom pilorinhu e lembra nos istoria, e konta nos pasadu, e sta sempre konsienti pa valor di asosiativismu e trabadja juntu pa podi tem maz justisa, paz, i dizenvolvimentu dentu kumunidadi.

Djunta mom ku nos nu ta fazi mas…

Orta kumunidadi Pilorinhu

Orta kumunidadi Pilorinhu

 Kuze, Pamodi, i pa Kenha?

Ku vontadi di rizolvi problema di fomi i sustentu di familias di kriansas i jovens i tudu kenha ki ta frikuenta Pilorinhu.

Das inerjia pes kontinua sis trabadju, das mas speransa ma manham ta txiga brillhanti si kre sol ka sai.

Sta mas em kontatu ku terra i speriementa kuza ki nu prendi ku nos grandi. Munti di nos dja tem kel speriensia di labuta ku terra di la di interior undi ki nos antipasadu bem.

 Di fora pa sidadi ki dja ka tem spasu. Homis passa ta invisti so na simentu, alkatrom i tudu e sintetiku.

Nu kre mas ar livri, mas prudutu di terra, nu kre kontatu ku nos  ambienti. Volta na tempu mininu femea ku matxu.

Orta e di nos pa nos i ku nos. Kada um trazi si gota di agu nu ta fazel um oazi na dizertu.
Ah kumunidadi si bu sabeba nos intensom diazar dja bu entraba na nos rotina.

Bu ka ta loba, bu gosta di cuspi na bu kumida, mas a nos ke nos. Di pilorinhu sempri bu ta volta.



Orta e nos forsa di trabadju, mom na inxada, agu na kabesa nha mai ta luta sime es ta kondenal mas e ska podi matal.

E ta fazi parti di nos  katxupa piladu na pilom, vivi di sor di bu trabadju.


Nos orta ki ta danu kumida.

Orta é um pilar di pilorinhu.

Diaspora nu ser amigu Asosiasom Pilorinhu

Probulemas na txom di nos tera sta komplikadu. Munti mininu sta abandonadu na rua: ku fomi, sem ropa, sem sapatu ta vivi um infansia infeliz.

Ka tem skola, ka tem kumida, ka tem idukasom, ka tem saudi .

Oki es kria kuze ki es sabi fazi? tudu nos dja sabi: munti bes é kriminalidadi, é prubulemas i mas problemas riba nos mesmu.

Stadu mesti valoriza i pruveta kompetensias ki sta na kumunidadi. Sta munti zona undi sta fazedu bons trabadju mas ka tem fundu pa da kontinuidadi a sis asom.

Munti spasu sta abandonadu, digradadu. Asosiasom Pilorinhu tem komu obijetivu kompus spasu i das vida i luz pa tudu sidadom. odja kazu di spasu Pilorinhu i Finka Pé na Lem-Ferrera.

Filosofia di nos é bai tud kou i djuda propi kumunidadi a labanta si kabesa.

Ta gastadu munti di dinheru pa publisidadi, propaganda, mas pa intervensom kontinuadu poku nu ta odja.

Pur isu e impurtanti, ki kada sidadom ki sta fora tem algum pusibilidadi apusta na si pais pa oki e volta.

Fazi bu parti, kontribui pa djuda kumunidadi ki bu dexa.

Si nu ka invisti oji ki sosiedadi nu sta pensa ba tem. Nu luta pa indipendensia pa país midjora mas ti inda nu sta odja grandi problema dentu kumunidadi.

Kal ke papel di Stadu i nos Sidadom?

 Purtantu kumunidadi di diaspora sta konvidadu pa ser Amigu di Asosiasom Pilorinhu i djuntu nu konstrui um futuru midjor pa nos País.

Kada um di nos fazi um poku nu ta tem um país midjor.

Um merkadu pexi ki bira sentru kumunitariu

Um merkadu pexi ki bira sentru kumunitariu
 

Pilorinhu nasi ku um filosofia di trazi um novu sosiativismu na kumunidadis spadjadu na país ku txeu problemas sosial.

Sosiativismu di djunta mo, di partilha i da bu tempu pa sosial

 

Pa kela  é odja klaramenti nisisidadi di abri spasu publikus fitxadu i das vida, okupa jovens i kriansa i kapasita i mobiliza  rikursus humanus na propi zona.

A pizar di konsiensia di difikuldadi di país, es prujetu kaba ku mostra ma e pussivel fazi txeu ku poku, trazi speransa pa kriansas muda vida di jovens marjinalizadu, das mas motivasom i speransa.

 

Ku parserias di varius entidadis publikus i privadas  oji dja teni um grupu di jovens ki bem di rua motivadu, ki sta fazi algum kuza pa sis kumunidadi i ti ka Partilha speriensias ku otus.

 Pilorinhu era um lixera oji e um mina di oru. 

Mo ki e surji?

 Antis, serka di 15 anu atras ideia di propi kumunidadi di zona piscatória, mudjeris di tabanka i batukadera, pexeras,  era ideia di serba konstruida um merkadu di pexi na zona Txada Grandi Frenti.

 Kantu spasu sta prontu pexeras fla: "Kenha ami, mi ki sta ba bendi pexi la kel kou la" i logu kumesa prusesu di marginalizasom di kel spasu publiku la.

Dipos di um tempu di guarda, é kaba pa ser um verdaderu lixera um risku a saudi publika.

 

Na inisiu di 2013 um grupu di jovens di diferenti zona mobilizadu num redi  txomadu Korenti di Ativista limpa spasu pa promovi atividade i da kontinuidadi a Prujetu simenti ki inisiadu na kel kumunidadi ku txeu karensia.

 

Dipos di kuazi dos anu dibaxu di resistensias okorri varius parserias publikus i oji é um Assosiasom ki toma Pilorinhu.

 

Asosiasom Pilorinhu surji na spontaneidadi, na resistênsia pa fortalesi pulitikas publikas di dizenvolvimentu kumunitariu.

 

E tem komu obijetivu reabilita, habilita i dinamiza spasus publikus abandonadus..

 

Pa atinji sis meta e trabadja ku varius pilar ki sta em konstrusom: Biblioteka Kumunitaria, Ristauranti Kumunitariu, Horta Kumunitaria, Alojamentu Artistiku i Kumunitariu.

 

Kes pilar li artikuladu  podi dinamiza i sustenta pilorinhu em varius atividades pa okupa i iduka saudavelmente tempu livri di kriansa i jovens i impodera kumunidadis na jeral

Pa da kontinuidadi, pilorinhu sta trabadja nes mumentu ku filosofia djunta mo i tenta resgata antigu sosiativismu mas e tem nisisidadi di mas inerjia humanu ki é midjor rikursu ki dja e sperimenta.

 

Bem ku nos djudanu bai undi ki nunca ka badu ku sosiativismu na Kabu Verdi. Nos tudu é um Konsikuensia di Pilorinhu.

 

Strela Negra ta siginifika Speransa na Luta, Kabral ka morri. Kriansa é Flor di Rivolusom.

Nos storia nu ka podi ser skesidu Pilorinhu é Merkadu, mas é nos Kultura tambe, é um statua di liberdadi.

Nu djunta mo kabu Verdi inda tem speransa me ta konsigi: Forsa